لاہور( این این آئی) آل پاکستان انجمن تاجران نعیم میر گروپ نے اپنے مطالبات کے حق میں ’’ ہارن بجائو حکمران جگائو ‘‘احتجاجی تحریک شروع کرنے کا اعلان کرتے ہوئے کہا ہے کہ آئندہ دو سے تین روز میں زیرو پوائنٹ سے وزیر اعظم ہائوس کی طرف مارچ کی تاریخ کا اعلان کر دیا جائے گا۔ مرکزی سیکرٹری جنرل نعیم میر نے ویڈیو بیان میں بتایا کہ گزشتہ روز آل پاکستان انجمن تاجران کے مرکزی و صوبائی قائدین کی
ویڈیو کانفرنس ہوئی ہے جس میں حکومت کے خلاف احتجاجی تحریک چلانے کا فیصلہ کیا گیا ۔ انہوں نے بتایا کہ احتجاجی تحریک کا نام ’’ہارن بجائو حکمران جگائو ‘‘رکھا ہے اور تحریک کے دوران کورونا وائرس سے بچائو کے لئے مرتب کردہ تمام ایس او پیز پر عملدرآمد کیا جائے گا ۔نعیم میر نے بتایا کہ تاجر اپنی گاڑیوں پر زیرو پوائنٹ اسلام آباد پہنچیں گے جہاں سے رخ وزیر اعظم ہائوس کی طرف کرینگے ۔اس دوران ہم ہیڈ لائٹس اور ییلو لائٹس آن کر کے اور بار بار ڈپر مار کر اور ہارن بجاتے وزیر اعظم پہنچیں گے جہاں زور زور سے بار بار ہارن بجائیں گے ۔ اس کا مقصد خواب غفلت میں سوئے حکمرانوں کو جگانا ہے ت تاکہ انہیں ہمارے مسائل کا اندازہ ہو ۔انہوں نے کہا کہ ہم نے کورونا وائرس کی وجہ سے حکومت سے بھرپور تعاون کیا اوراب جزوی لاک ڈائون ، محدو د ایام ، محدود اوقات کار کاروبار او ر اوپر سے ہوشربا مہنگائی یہ سب وہ عوامل ہیں جنہوں نے ہمیں مجبور کر دیا ہے ہم حکمرانوں کے دروازوں کے کھٹکھٹائیںاور انہیں نیند سے جگائیں ۔انہوں نے کہا کہ یہ کسی کی ذات کا یا انفرادی مسئلہ نہیں بلکہ پوری تاجر برادری کا مسئلہ ہے ، ہم نے تازہ چارٹر آف ڈیمانڈ بھی تیار کر لیا ہے جسے وزیر اعظم ہائوس میں پیش کریں اورہماری کوشش ہو گی کہ ہم حکمرانوں کو جگائیں اور پھر سمجھائیں ۔آئندہ دو سے تین روز میں حتمی تاریخ اور وقت کا بھی بذریعہ پریس کانفرنس اعلان کیا جائے گا ۔
