اسلام آباد (آن لائن) وزیر اعظم عمران خان نے کہا ہے کہ اتحادیوں کو ساتھ لیکر چلیں گے، وعدے بھی پورے کرینگے۔ انہوں نے یہ بات بلوچستان عوامی پارٹی کے وفد سے ملاقات کے دوران کہی ۔ ملاقات میں بجٹ منظوری اور بلوچستان کے مسائل سے متعلق اہم امور پر بات چیت کی گئی۔ ذرائع کے مطابق بی اے پی کے وفد نے وزیراعظم کو بلوچستان کے مسائل سے آگاہ کیا اور بلوچستان کے حوالے سے وعدے پورے کرنے کا مطالبہ کیا۔
اس موقع پر وزیر اعظم عمران نے وفد کویقین دھانی کرائی کہ اتحادیوں کو ساتھ لیکر چلیں گے، وعدے بھی پورے کرینگے۔ بی اے پی وفد نے یقین دہانی کرائی وہ کہ بجٹ منظوری میں تعاون کرینگے۔ وفد میں وفاقی زبیدہ جلال، احسان اللہ ریکی،خالد حسین مگسی،محمد اسرار ترین،روبینہ عرفان شامل تھے جبکہ وزیر خارجہ شاہ محمود قریشی،وزیر دفاع پرویز خٹک ،وزیر تعلیم شفقت محمود،ڈپٹی سپیکر قومی اسمبلی محمد قاسم سوری اور چیف وہیپ ملک عامر ڈوگر بھی ملاقات کے موقع پر موجودتھے۔ بلوچستان عوامی پارٹی نے وزیراعظم کے عشائیے میں شرکت اور بجٹ کی منظوری میں حکومت کو مکمل سپورٹ کرنے کا فیصلہ کیا ہے۔ بلوچستان عوامی پارٹی حکومت کی اتحادی جماعت ہے جس کا ایک وزیر بھی کابینہ کا حصہ ہے۔ خیال رہے کہ بلوچستان عوامی پارٹی نے وزیراعظم سے ملاقات میں ایک مزید وزارت نہ ملنے پر بھی وزیراعظم کو تحفظات سے آگاہ کیا تھا۔۔دریں اثناء وزیر اعظم عمران خان سے ایم کیو ایم پاکستان وفد نے بھی ملاقات کی ۔متحدہ قومی موومنٹ پاکستان کے و فد کی قیادت کنوینر خالد مقبول صدیقی نے کی۔ وفد میں وفاقی وزیر امین الحق، اقبال محمد خان، اسامہ قادری، اقبال محمد علی اور کشور زہرا ش بھی شریک تھے۔ وزیر خارجہ شاہ محمودقریشی، وزیر دفاع پرویز خٹک، وفاقی وزیر پلاننگ اسد عمر، وزیر تعلیم شفقت محمود،ڈپٹی اسپیکر قومی اسمبلی قاسم سوری اور چیف وہیپ عامر ڈوگربھی ملاقات میں شامل تھے ۔ ذرائع کے مطابق متحدہ قومی موومنٹ پاکستان نے کراچی کے مسائل اور قومی ایشوز پر بات کی۔ پٹرول کی قیمتیں بڑھنے سے پیدا ہونے والے مسائل، کراچی کے ترقیاتی منصوبوں کا معاملہ اٹھایا۔علاوہ ازیں وزیر اعظم عمران خان سے رکن قومی اسمبلی محمد اسلم بھوتانی نے ملاقات کی ہے۔ملاقات میں وفاقی بجٹ، قومی امور پر تبادلہ خیال کیا گیا۔
