تہران (این این آئی)ایران میں کرونا سے ہلاکتوں اور نئے کیسز کی تعداد میں ایک بار پھر اضافہ دیکھنے میں آیا ہے۔ ایرانی محکمہ صحت کے حکام نے کہاہے کہ  کرونا کے نتیجے میں 9 اضلاع کے باشندوں کو شدید خطرات لاحق ہیں۔میڈیارپورٹس کے مطابق

ایرانی وزارت صحت کی ترجمان سیما لاری نے بتایا کہ گذشتہ 24 گھنٹوں کے دوران ملک میں کرونا وائرس کے نیتجے میں مزید 109 اموات اور 2،628 نئے کیسز سامنے آئے۔ انہوں نے کہا کہ ملک کے نو اضلاع کو خطرناک قرار دیا گیا ہے۔لاری نے ایرانی ٹیلی ویژن پر اپنے روزانہ اپ ڈیٹ کے دوران بتایا کہ ایران میں کرونا سے ہلاکتوں کی کل تعداد 10239 ہوگئی جبکہ متاثرین کی کل تعداد جمعہ کی دوپہر تک 217،724 تک پہنچ گئی تھی۔ ان میں سے 2912 مریضوں کی حالت تشویشناک ہے۔سیما لاری نے بتایا کہ ملک کے نو اضلاع ، کرمان شاہ ، کردستان ، اہواز ، ہرمزگان ، مغربی آذربائیجان ، مشرقی آذربائیجان ، خراسان رضوی ، البرز اور بوشہر کی صورتحال خطرناک ہے اور ان علاقوں میں کرونا کی وبا مزید تباہی پھیلا سکتی ہے۔

موضوعات:ایران میں کرونا سے ہلاکتوں میں اضافہ