واشنگٹن(این این آئی )امریکی نائب صدر مائیک پنس کی پریس سیکریٹری کیٹی ملر کا کورونا وائرس ٹیسٹ مثبت آگیا جس کی تصدیق امریکی صدر ڈونلڈ ٹرمپ نے بھی کردی ہے۔میڈیارپورٹس کے مطابق وائٹ ہاوس میں ری پبلکن پارٹی کے اراکین کانگریس سے ملاقات میں گفتگو کرتے ہوئے امریکی صدر ڈونلڈ ٹرمپ نے کہا کہ کیٹی ملر بہت ہی اچھی خاتون ہیں، ان کا کورونا وائرس ٹیسٹ مثبت آگیا ۔
امریکی صدر نے مزید کہا کہ متاثرہ خاتون کی ان سے ملاقات نہیں ہوئی لیکن نائب صدر مائیک پنس سے مریضہ کی حال ہی میں ملاقاتیں رہی ہیں۔غیر ملکی میڈیا کے مطابق متاثرہ خاتون کیٹی ملر امریکی صدر کے سینئر مشیر اسٹیفن ملر کی اہلیہ ہیں۔یاد رہے کہ گزشتہ روز امریکی صدر ٹرمپ کے ساتھ کام کرنے والے شخص میں بھی کورونا کی تشخیص ہوئی تھی جو کہ وائٹ ہاوس میں ملازم اور نیوی کا اہلکار ہے۔
