اسلام آباد(نیوز ڈیسک)روس پر پابندیاں،امریکہ کا اعلان-امریکی وزیردفاع ایش کارٹرکا کہنا ہے کہ روس سے دشمنی نہیں چاہتے لیکن اپنا دفاع کرنا بھی جانتے ہیں۔غیرملکی خبررساں ادارے کے مطابق جرمنی کے دارالحکومت برلن میں تقریب سے خطاب کرتے ہوئے امریکی وزیردفاع ایش کارٹرکا کہنا تھا کہ امریکا روس سے نہ کوئی دشمنی چاہتا ہے اورنہ ہی کسی بھی قسم کا تنازع کھڑا کرنا چاہتا ہے لیکن امریکا ضرورت پڑنے پر اپنا دفاع ضرورکرے گا۔ ان کا کہنا تھا کہ اس وقت مغربی ممالک کو روس سے جو خطرات لاحق ہیں ان میں یوکرین کا معاملہ اس کا صرف ایک پہلو ہے۔امریکی وزیردفاع کا کہنا تھا کہ روس پرعائد کی جانے والی اقتصادی پابندیوں کے نتیجے میں ماسکو حکومت کی یوکرین میں جارحیت پرقابو پانے میں مدد مل رہی ہے اور جب تک یوکرین میں روسی مداخلت کا مکمل خاتمہ نہیں ہوجاتا یہ پابندیاں برقراررکھی جائیں گی۔ انہوں نے مزید کہا کہ مغربی ممالک کی جانب سے ماسکو کو یہ واضح کردیا گیا ہے کہ وہ ماضی کی طرح کسی بھی ریاست کے ساتھ زبردستی نہیں کرسکتا۔