اسلام آباد(نیوز ڈیسک) حکومت پاکستان نے کورونا کا علاج اور ٹیسٹ کرنے والے اداروں میں طبی فضلے کو ٹھکانے لگانے کے لئے حفاظتی ہدایت نامہ جاری کردیا ۔منسٹری آف نیشنل ہیلتھ سروسز ریگولیشن اینڈ کوارڈینیشن کی جانب سے جاری کیے گئے ہدایت نامہ کے مطابق ملک بھر کے طبی اداروں میں کام کرنے والے ڈاکٹروں،
پیرامیڈیکل اور دیگر عملے کی زندگی کو محفوظ بنانا اولین ترجیح ہے۔ہدایت نامے کے مطابق کورونا وائرس کے مریض پر استعمال ہونے والے طبی آلات کا مکمل اندراج اور لاگ بک بنائی جائی ، آلات اور فضلے کے خطرے کی نوعیت کے حساب سے مختلف رنگوں کے ڈسٹ بین یا کنٹینرز اور ٹریش بن رکھے جائیں گے۔اس کے علاوہ یومیہ بنیادوں پر ہسپتا ل اور لیب میں موجود تمام آلات اور مشینری کو جراثیم کش اسپرے سے صاف کیا جائے ، متاثرہ مریض پر استعمال ہونے والے آلات کو دوبارہ استعمال نہیں کیا جائے ۔کورونا وائرس کے مریض کے طبی فضلے کو سرخ رنگ کے تھیلے یا کنٹینر میں رکھا جائے ، طبی فضلے کے کنٹینر کو فوری طور پر انسنیریٹر کے ذریعے تلف کیا جائے، آئسولیشن وارڈ ،لیباٹری سمیت متاثرہ مریضوں کی آمدورفت والی جگہ کو اچھے طریقے سے صاف کیا جائے جراثم کش اسپرے اور کیمیکلز کا استعمال بھی ضرور کیا جائے ۔ڈاکٹر ،پیرامیڈیکل اسٹاف اپنے ،ماسک، دستانے اور گاون کو ایک بار استعمال کرنے کے بعد تلف کردیں۔
