لاہور(نیوزڈیسک) تحریک انصاف ایک بارپھرحکومت کے خلاف میدان میں آگئی ۔پنجاب میں اپوزیشن لیڈراورتحریک انصاف کے رہنمامیاں محمود الرشید نے ملک بھر بالخصوص پنجاب میں بڑھتی ہوئی بجلی کی لوڈشیڈنگ کے خلاف کل پنجاب اسمبلی کی سیڑھیوں پر احتجاج کا اعلان کر دیا۔ اپوزیشن ارکان کچھ دیر کے لئے اسمبلیوں کی سیڑھیوں پر دھرنا دیں گے جبکہ اسمبلی سیکرٹریٹ میں لوڈشیڈنگ کے خلاف مذمتی قرارداد بھی جمع کرائی جائے گی۔ میاں محمود الرشید پیپلز پارٹی، جماعت اسلامی اور (ق) لیگ کو بھی احتجاج میں شرکت کی دعوت دیں گے۔ اپوزیشن لیڈر کا کہنا ہے کہ لوڈشیڈنگ کا جن بے قابو ہو چکا ہے جس کیخلاف بھرپور احتجاج کریں گے۔ حکومت وعدے اور اعلانات کچھ کرتی ہے جبکہ عملی صورتحال اس کے برعکس ہے۔