ممبئی (نیوزڈیسک)بالی ووڈ کے کامیاب پروڈیوسر، ہدایت کار اور اداکار کرن جوہر پانچ سال کے طویل عرصے کے بعد اپنے قریبی دوست اور بولی وڈ کے بادشاہ شاہ رخ خان کے ساتھ کوئی فلم کریں گے۔بولی وڈ لائف کے مطابق کرن جوہر نے شاہ رخ خان کے ساتھ ایک نئی فلم کے اسکرپٹ پر کام کرنا بھی شروع کردیا ہے۔یاد رہے کہ شاہ رخ اور کرن جوہر کی ایک ساتھ بنائی گئی تقریباً ہر فلم ہی باکس آفس پر کامیاب ثابت ہوئی ہے اور دونوں بہت اچھے دوست بھی ہیں۔کرن جوہر اور شاہ رخ خان نے آخری مرتبہ ایک ساتھ 2010 میں فلم ”مائے نیم از خان” میں کام کیا تھا، اس فلم میں شاہ رخ کے ساتھ ان کی قریبی دوست اور پسندیدہ اداکارہ کاجول نے بھی اہم کردار ادا کیا تھا۔فلم ”مائے نیم از خان” میں شاہ رخ خان نے ایک مسلمان کا کردار ادا کیا تھا اور اس فلم نے باکس آفس پر بڑی کامیابی حاصل کی تھی۔خبروں کے مطابق کرن جوہر اور شاہ رخ خان کے درمیان طویل عرصے سے حالات کچھ ٹھیک نہیں البتہ اب حالات تبدیل ہو رہے ہیں۔