اسلام آباد(آن لائن)وفاقی وزیر اقتصادی امور حماد اظہر نے کہا ہے کہ تحریک انصاف کے فارن فنڈنگ کیس کو سیاسی بنا کر چائے کی پیالی میں طوفان برپا کرنے کی کوشش کی جارہی ہے۔ میرے لیڈر عمران خان کو سپریم کورٹ نے صاد ق و امین قراردیا، انہوں نے چالیس سال پرانی رسیدیں پیش کیں۔ نہ پہلے کچھ چھپایانہ اب چھپائیں گے۔ الیکشن کمیشن دوبارہ شواہد مانگے گا تو وہ بھی دیں گے۔ اتوار کے روز نجی ٹی وی سے گفتگو کرتے ہوئے حماد اظہر نے کہا کہ اپوزیشن نے فارن فنڈنگ کیس کو ایسے پیش کیا جیسے کوئی بہت بڑی چیز ہاتھ لگ گئی ہو۔ چائے کی پیالی میں طوفان کو بڑا بنا دیا گیا۔ حماد اظہر نے کہا کہ پی ٹی آئی فارن فنڈنگ کیس کو سیاسی بنادیا گیا ہے۔الیکشن کمیشن دس مہینے تک اس کیس کو دبا کر بیٹھا رہا اور اب دس ماہ بعد سکروٹنی کمیٹی بنادی گئی ہے۔ ہم نے نہ پہلے کبھی کچھ چھپایا نہ اب چھپائیں گے الیکشن کمیشن دوبارہ شواہد مانگے گا تو دیں گے۔انہوں نے کہا کہ تحریک انصاف کے آڈٹ شدہ اکاؤنٹس کی سکروٹنی ہوتی رہتی ہے۔ ویب سائٹ پر تمام ووٹرز کی لسٹ موجود ہے۔ بلا امتیاز کاروائی کی ہدایت کا مطلب یہ ہے کہ دیگر جماعتوں کے فنڈز بھی چیک کئے جائیں۔ حماد اظہر نے کہا کہ میرے قائد عمران خان کو ملک کی سب سے بڑی عدالت نے صادق اور امین قرار دیا ہے۔ عمران خان نے چالیس سال پرانی رسیدیں بھی عدالت میں پیش کی ہیں۔ (شکیل)

موضوعات:حماد اظہر