لاہور(این این آئی)پاکستان مسلم لیگ (ن) کے قائد محمد نواز شریف سے ان کے چھوٹے بھائی شہباز شریف نے جاتی امرا ء رائے ونڈ میں ملاقات کی۔ ذرائع کے مطابق چار گھنٹے تک جاری رہنے والی ملاقات میں مریم نوازاور دیگر اہل خانہ بھی موجود تھے۔ملاقات میں حکومت کی جانب سے نواز شریف کو بیرون ملک علاج کیلئے مشروط اجازت کے حوالے سے تفصیلی تبادلہ خیال کیا گیا۔

ذرائع کے مطابق شہبازشریف نے اپنے بڑے بھائی کوآج ہونے والے پارٹی کے مرکزی رہنماؤں کے اجلاس او رشیڈول پریس کانفرنس کے حوالے سے بھی اعتماد میں لیا۔واضح رہے کہ پاکستان مسلم لیگ (ن)نے نوازشریف کے بیرون ملک علاج کیلئے حکومت کی مشروط اجازت کو مسترد کردیا۔ترجمان مسلم لیگ ن مریم اورنگزیب کا وفاقی وزیر قانون بیرسٹر فروغ نسیم کی پریس کانفرنس کے ردعمل میں کہنا ہے کہ حکومتی فیصلہ عمران خان کے متعصبانہ رویے اور سیاسی انتقام پر مبنی ہے۔ ضمانت کے وقت آئینی و قانونی تقاضے پورے اور ضمانتی مچلکے جمع کرائیجاچکے ہیں۔مریم اورنگزیب کا کہنا ہے کہ نوازشریف کا نام ایگزٹ کنٹرول لسٹ(ای سی ایل)سے نکالنے کو مشروط کرنا ناقابل فہم حکومتی فیصلہ ہے، ای سی ایل سینام نکالنے کو مشروط کرنے کی پاکستان کی تاریخ میں مثال نہیں ملتی، ضمانت کے لیے آئینی اور قانونی تقاضے پہلے ہی پورے کیے جاچکے ہیں،عدالت کے اوپر ایک اور حکومتی عدالت نہیں لگ سکتی۔ان کا کہنا ہے کہ ای سی ایل سے نام نکالنے کو مشروط کرنے کی پاکستان کی تاریخ میں مثال نہیں ملتی، اس حوالے سے مسلم لیگ ن اپنا واضح موقف پیش کر چکی ہے۔ن لیگ کی ترجمان کا کہنا تھا کہ حکومت ایک طرف نوازشریف کی صحت کی سنگینی کا اعتراف کر رہی ہے تو دوسری جانب بد نیتی سے نوازشریف کے بیرون ملک علاج میں رکاوٹیں ڈال رہی ہے۔ نواز شریف کے علاج میں ہر لمحہ انتہائی قیمتی ہے اور ان کے علاج کو تاخیری حربوں کی نذر کرنا بدترین ظلم اور زیادتی ہے۔

ترجمان ن لیگ کا کہنا تھا کہ نواز شریف کو کچھ ہوا تو اس کی ذمہ دار بے حس اور سنگ دل حکومت ہوگی، حکومت تاخیری حربوں سے نوازشریف کی زندگی اور صحت سے کھیل رہی ہے۔مریم اورنگزیب کا مزید کہنا تھا کہ شہباز شریف نے پارٹی کی سینیئر قیادت کا اجلاس کل طلب کیا ہے،جس میں حکومتی فیصلے کے بعد کی حکمت عملی پر سینیئر قیادت کو اعتماد میں لیا جائے گا جب کہ شہباز شریف جمعرات کو سہہ پہر 3 بجے پریس کانفرنس بھی کریں گے۔