راولپنڈی،اسلام آبا د(این این آئی)سپرنٹنڈنٹ اڈیالہ جیل نے آصف زردرای کی طبعیت خراب ہونے کی خبروں کی تردید کردی۔ سپرنٹنڈنٹ اڈیالہ جیل ثاقب نذیر نے کہاکہ سابق صدر اڈیالہ جیل میں صحت مند ہیں ،آصف زردرای کو جیل میں طبی سہولیات دستیاب ہیں۔ انہوں نے کہاکہ سابق صدر کو صحت کا کوئی ایشو نہیں،میڈیا سے درخواست ہے کسی بھی قسم کہ خبر سے پہلے اس کی تصدیق کرلیں۔اس سے پہلے سیکریٹری جنرل پاکستان پیپلز پارٹی سید نیر حسین بخاری نے کہاتھا
کہ سابق صدر آصف علی زرداری کی صحت بارے پیپلز پارٹی کی تشویش پر توجہ نہیں دی جا رہی ہے ۔ ایک بیان میں انہوں نے کہاکہ آصف زرداری کو فوری طور پر ہسپتال منتقل کیا جائے،آصف زرداری کے علاج بارے ڈاکٹرز کی ہدایات نظر انداز کرنا قانونی حق کا قتل ہے۔ انہوں نے کہاکہ آصف زرداری کو جھکانے کی ہر کوشش اور کاوش ناکامی پر ختم ہوتی ہے،چیرمین بلاول بھٹو کو دباؤ میں لانے کے حربے اور ہتھکنڈے کامیاب نہیں ہو سکتے۔
