مظفر آباد ( آن لائن) وزیر اعظم آزاد کشمیر راجہ فاروق حیدر خان نے وزیر خارجہ شاہ محمود قریشی کو خط لکھتے ہوئے کہا ہے کہ اسلام آباد میں اقوام متحدہ ہیڈ کواٹر اور سلامتی کونسل کے پانچ مستقل ارکان کے نمائندوں سے کہا جائے کہ وہ لائن آف کنٹرول عبور کرنے والے مارچ کے شرکاء سے چکوٹھی میں ملاقات کریں۔
وزیر اعظم آزاد کشمیر راجہ فاروق حیدر خان نے اس خط کی کاپیاں اسلام آباد میں اقوام متحدہ کے ہیڈ کواٹر اور اقوام متحدہ کی سلامتی کونسل کے مستقل ارکان کو بھی ارسال کی ہیں۔7اکتوبر2019کو زیر نمبرپی ایم ایس/10980-86خط میں وزیراعظم آزاد کشمیر نے کہا ہے کہ بھارتی مقبوضہ کشمیر کی حالیہ صورتحال کی وجہ سے آزاد کشمیر میں ہزاروں کی تعداد میں لوگ لائین آف کنٹرول عبور کر کے محاصر ے میں قید اپنے بہن،بھائیوں کے پاس جانے کے لئے لانگ مارچ کر رہے ہیں۔بھارتی مقبوضہ کشمیر میں کرفیو،ہر قسم کا مواصلاتی نظام منقطع،سیاسی رہنما گرفتار اور بارہ سال سے تیس سال کے 13ہزار سے زائد نوجوانوں کو گرفتار کیا گیا ہے۔وزیر اعظم راجہ فاروق حیدر خان نے کہا کہ آزاد کشمیر حکومت پر عوام کی طرف سے بہت زیادہ دباؤ ہے کہ انہیں ’ایل او سی‘ عبور کرنے دیا جائے لیکن علاقے کے امن و امان کے وسیع مفاد میں مارچ کے شرکاء کو لائن آف کنٹرول سے پانچ کلومیٹر پہلے روک رکھا ہے اور ان سے مارچ ختم کرنے کی درخواست کی ہے۔لیکن مارچ کے منتظمین اپنی قیمتی جانوں کی پرواہ کئے بغیر لائین آف کنٹرول عبور کرنے کے لئے پرعزم ہیں۔ہماری طرف سے بات چیت میں انہوں نے مارچ ختم کرنے سے انکا رکیا ہے اور کہا ہے کہ انہیں اپنا نقطہ نظر بیان کرنے کے لئے اقوام متحدہ اور سلامتی کونسل کے نمائندوں سے ملاقات کا موقع دیا جائے۔
