اسلام آباد (این این آئی)وزیر اعظم کی معاون خصوصی برائے اطلاعات و نشریات ڈاکٹر فردوس عاشق اعوان نے کہا ہے کہ مولانا کا مارچ مسلم لیگ (ن )اور پی پی پی کے اندر فساد کا باعث بن گیا ہے ،مولانا فضل الرحمن 27اکتوبر کے دن کو اپنے انتشار پر مبنی مارچ سے سبوتاز نہ کریں۔
جمعرات کو ٹویٹر پر اپنے ایک بیان میں وزیراعظم کی معاون خصوصی اطلاعات ڈاکٹر فردوس عاشق اعوان نے کہا کہ 27 اکتوبر کو دنیا بھر کے کشمیری بھارت کے غاصبانہ قبضے کے خلاف یوم سیاہ مناتے ہیں،مولانا فضل الرحمان اس دن کو اپنے انتشار پر مبنی مارچ سے سبوتاز نہ کریں۔انہوںنے کہا کہ مولانا کا مارچ مسلم لیگ (ن )اور پاکستان پیپلز پارٹی کے اندر فساد کا باعث بن گیا ہے۔انہوں نے کہاکہ مولانا کے مارچ نے دونوں جماعتوں کے اندر آگ لگادی ہے،کائرہ صاحب کچھ کہتے ہیں تو مولا بخش چانڈیو کا بیان کچھ اور ہے۔انہوں نے کہا کہ شہباز شریف فیصلے کیلئے کمیٹی بنانے کا اعلان کرتے ہیں تو داماد صاحب بازی لے جاتے ہیں۔معاون خصوصی نے کہا کہ مسلم لیگ (ن) میں مفادات کے ٹکراؤ اور دو بیانیوں کے درمیان خلیج گہری کھائی میں بدل رہی ہے۔
