کراچی(نیوزڈیسک)کراچی میں سانحہ صفورہ گوٹھ میں گرفتار پانچ ملزمان ،دہشت گردی کی 37 وارداتوں میں ملوث ہیں، جے آئی ٹی رپورٹ میں اہم انکشافات سامنے آگئے۔ سانحہ صفورہ گوٹھ کی جے آئی ٹی رپورٹ میں اہم انکشافات سامنے آئے ہیں- ڈی آئی جی ساوتھ ڈاکٹر جمیل نے پریس کانفرنس کے دوران رپورٹ کے حوالے سے بتایا کہ کالعدم جماعت سے تعلق رکھنے والے پانچوں ملزمان دہشت گردی کی 37وارداتوں میں ملوث ہیں، ان میں سبین محمود قتل کیس، ڈیبرالوبو پر حملہ ، اسکولوں پر کریکر حملہ اور دیگر وارداتیں بھی شامل ہیں۔ سانحہ صفورہ میں حملہ آوروں کی تعداد 13 تھی تاہم 5 گرفتار دہشت گردوں کے قبضے سے 4 موٹر سائیکلیں ، دو گاڑیوں سمیت بھاری تعداد میں اسلحہ برآمد ہوا، جس میں 2 کلاشنکوف، رائفل، 5 نائن ایم ایم پستول، دو سائیلینسر،6دستی بم، آدھا کلو زہر،پولیس کی وردی اور سانحہ صفورہ میں جاں بحق ہونے والوں کے خون سے آلودہ کپڑوں سمیت 50موبائل فون سمز اور 7 لیپ ٹاپ برآمد کر لئے گئے ہیں۔ سانحہ صفورہ کے باقی ملزمان کی گرفتاری کے لئے نئی تحقیقاتی کمیٹی تشکیل دے دی گئی ہے، جس میں ڈی ا?ئی جی ایسٹ، ایس ایس پی ایسٹ سمیت ایس پی ملیر اور کاونٹر ٹیررازم ڈپارٹمنٹ کا ایک افسر شامل ہوگا۔