نیویارک /صنعاء(این این آئی) عالمی ادارہ صحت نے صنعاء کے دفتر میں کرپشن کا اعتراف کرلیا ہے ۔ غیر ملکی میڈیا کے مطابق عالمی ادارہ صحت کی طرف سے جاری ایک بیان میں کہا گیا ہے کہ ڈبلیو ایج او کے یمن میں مقامی شراکت داروں کے ساتھ طے پائے بعض معاہدے ختم کیے جا رہے ہیں،یہ اعلان ایک ایسے وقت میں کیا گیا ہے جب عالمی ادارہ حوثی باغیوں کے زیر تسلط صنعاء میں موجود اپنے دفتر میں کرپشن کا اعتراف کر چکا ہے۔بیان میں کہا گیا کہ عالمی ادارہ 2018ء کے پروگرام پر نظر ثانی کرے گا۔
یمن میں تنظیم کا نیا ڈائریکٹر اور ملازمین تعینات کیے جائینگے اور موجودہ انتظامیہ کو ہٹایاجائیگا۔بیان میں یقین دلایا گیا کہ رواں سال کے آخر تک یمن میں عالمی ادارہ صحت کی سرگرمیوں کی رپورٹ آنے کے بعد مبینہ بدعنوانی کے واقعات کا حل نکال لیا جائیگا۔ بیان میں اعتراف کیا گیا ہے کہ مالیاتی اور انتظامی ضابطہ کار کے حوالے سے یمن سے مایوس کن خبریں مل رہی ہیں۔ کہا گیا کہ عالمی ادارہ صحت یمن میں با صلاحیت، تجربہ کار اور ہنگامی حالات سے نمٹنے کی صلاحیت رکھنے والا عملہ تعینات کرے گا۔
