اسلام آباد(نیوز ڈیسک) سیہون شریف لعل شہباز قلندر کے عرس میں شرکت کے لئے آئی 50 سالہ خاتون سمیت 10 زائرین گرمی کی شدت اور نہر میں ڈوبنے سے جاں بحق ہو گئے ہیں۔ جاں بحق افراد کا تعلق پنجاب کے مختلف علاقوں سے ہے۔ میتیں آبائی علاقوں میں بھجوا دی گئیں۔ میڈیا رپورٹس کے مطابق ہفتہ کے روز سے سیہون شریف میں لعل شہباز قلندر کے عرس کے سلسلے میں 3 روزہ تقریبات کا آغاز ہو گیا ہے اور عرس کے پہلے ہی روز گرمی اور لو لگنے سے 8 افراد جبکہ لعل باغ نہر میں ڈوبنے سے 2 افراد جاں بحق ہو گئے ہیں جاں بحق ہونے والوںمیں بچے اور خواتین بھی شامل ہیں۔ ایدھی انچارج کے مطابق جاں بحق ہونے والے افراد کا تعلق پنجاب کے مختلف علاقوں سے ہے۔ ہلاکتیں گرمی کی شدت اور نہر میں ڈوبنے کی وجہ سے ہوئی ہیں تمام میتوں کو آبائی علاقوں میں بھجوا دیا گیا ہے۔