اسلام آباد (نیوز ڈیسک) وفاقی دارالحکومت میں اسلام آباد ایکسپریس وے پر زیرو پوائنٹ کے مقام پر مسافر وین میں اچانک آگ بھڑ ک گئی‘ تاہم ڈرائیور سمیت تمام مسافر حادثے میں محفوظ رہے۔ مسافر وین مکمل طور پر تباہ ہو گئی۔ میڈیا رپورٹس کے مطابق ہفتہ کے روز بحریہ ٹاﺅن سے مسافروں سے بھری ہائی ایس وین پاک سیکرٹریت کی طرف آ رہی تھی کہ ایکسپریس وے پر زیرو پوائنٹ کے مقام پر اچانک آگ بھڑ ک گئی تاہم کوئی جانی نقصان نہیں ہوا۔ واقعہ کی اطلاع ملتے ہی پولیس اور امدادی ٹیمیں موقع پر پہنچ گئیں۔ ڈرائیور کے مطابق گاڑی میں آگ الیکٹرک وائر میں خرابی کے باعث لگی جونہی دھنواں محسوس ہوا ہم نے گاڑی موقع پر کھڑی کر دی اور مسافروں کو فوری طور پر گاڑی سے باہر نکال دیا جس کی وجہ سے تمام مسافر محفوظ رہے۔