اسلام آباد(نیوز ڈیسک) وزیر اعلیٰ پنجاب شہباز شریف نے کہا ہے کہ اسلحہ کے خلاف پنجاب میں بڑا کریک ڈاﺅن شروع کرنے جا رہے ہیں،مقتول ایم پی اے رانا شمشاد قتل کیس میں ملوث کچھ افراد پکڑے جا چکے ہیں اور باقی ملزمان کو بھی جلد پکڑ لیا جائے گا۔ کامونکی میں مقتول ایم پی اے رانا شمشاد کے اہلخانہ سے تعزیت کے موقع پر وزیر اعلیٰ پنجاب کا کہنا تھا کہ رانا شمشاد کے قتل پر رنجیدہ ہیں۔ انہوں نے کہا کہ رانا شمشاد کے قاتلوں کو انجام تک پہنچانے تک چین سے نہیں بیٹھیں گے۔شہباز شریف نے مقتول ایم پی اے رانا شمشاد کے اہلخانہ کو یقین دلایا کہ مسلم لیگ ن کا ہر ورکر اور پنجاب حکومت ان کے ساتھ ہے۔ وزیراعلیٰ کا کہنا تھا کہ پنجاب کی عوام کو دنیا کی ہر سہولت فراہم کرنا ان کا مشن ہے جس پر تیزی سے عملدرآمد ہو رہا ہے۔