کراچی(این این آئی)کراچی میں لینڈ مافیا نے کے ڈی اے کا پورے انڈسٹریل زون پر قبضہ کرکے نئی داستان رقم کردی۔ دس ارب روپے کے 800 پلاٹس پر فیکٹریاں تونہ بن سکیں مگر انتظامیہ نے انڈسٹریل زون کو خود ہی “نوگوایریا” قرار دے دیا۔کراچی میں قانون نافذ کرنے والے ادارے آپریشن کر رہے ہیں لیکن اس کے باوجود بھی کراچی کے علاقہ سرجانی ٹائون کے سیکٹر 8 اور 9 میں کے ڈی اے سمیت کوئی سرکاری ملازم نہیں جاسکتا۔کراچی ڈیولپمنٹ اتھارٹی نے 1985 میں ایک ہزاراور 500 گزکے 800 سے زائد پلاٹس فیکٹریوں
کے لیے مختص کیے تھے لیکن لینڈ مافیا نے تمام منصوبے خاک میں ملا دیے۔ اب یہاں سرکاری نہیں بلکہ لینڈ مافیا کا کنٹرول ہے۔یہاں کا لینڈ مافیا اتنا طاقتور ہے کہ خود کے ڈی اے نے ہی انڈسٹریل زون کو نوگو ایریا قرار دے دیا۔اسکیم 41 کے ایگزیکٹو انجینئر محسن رضا نے اس ضمن میں بتایاکہ ایک ہزار اور پانچ سو گز کے آٹھ سو سے زائد پلاٹس ہیں۔ جن میں نوے فیصد پر قبضہ ہوچکا ہے۔ ہم نے رینجرز، پولیس اور اینٹی انکروچمنٹ کو خط لکھا ہے کہ آپ ہماری مدد کریں۔ اس کی ٹرانزیکشن سے کے ڈی کو بھی آمدنی ہوگی جبکہ انڈسٹریل زون کے قیام سے لوگوں کو روزگار بھی ملے گا۔
