لاہور(این این آئی) ٹیم مینجمنٹ نے قومی کرکٹرز عابد علی اور محمد رضوان کو وطن واپس جانے کی ہدایت کر دی۔عابد علی انگلینڈ کے خلاف سیریز میں پاکستانی سکواڈ کا حصہ تھے اور ان کا نام ورلڈکپ کیلئے ابتدائی اعلان کردہ سکواڈ میں بھی شامل تھا۔تاہم انگلینڈ کے خلاف سیریز میں اچھی کارکردگی نہ دکھانے کے باعث آصف علی کو ورلڈ کپ
میں موقع فراہم کیا گیا۔ مزید بتایا گیا ہے کہ ٹیم مینجمنٹ نے عابد علی کو برمنگھم میں ٹریننگ جاری رکھنے کی ہدایت کی تھی تاکہ ضرورت پڑ نے پر انہیں ورلڈکپ کیلئے سکواڈ میں شامل کیا جا سکے او ران کے ساتھ محمد رضوان کو بھی برمنگھم طلب کیا گیا تھا۔ اب ٹیم مینجمنٹ نے دونوں کھلاڑیوں کو وطن واپس جانے کی ہدایت کر دی ہے۔
