اسلام آباد (نیوز ڈ یسک) پاکستان میں موبائل فون استعمال کرنے والے کروڑوں صارفین کے لیے پاکستان ٹیلی کمیونیکیشن اتھارٹی (پی ٹی اے) نے ایک نئی سہولت متعارف کروا دی ہے،

جس کا مقصد ٹیرف سے متعلق معلومات کو زیادہ واضح اور آسان انداز میں عوام تک پہنچانا ہے۔پی ٹی اے نے صارفین کی آگاہی اور قیمتوں میں شفافیت کو فروغ دینے کے لیے اپنی سرکاری ویب سائٹ کے “صارفین کی آگاہی” سیکشن کو مزید اپ ڈیٹ کیا ہے۔ نئے فیچرز کے ذریعے صارفین مختلف موبائل پیکیجز اور ان کی قیمتوں کا آسانی سے جائزہ لے سکیں گے۔ادارے کی جانب سے جاری کردہ معلومات کے مطابق ملک میں کام کرنے والی تمام موبائل کمپنیوں کے صارفین میں مقبول 15 ہائبرڈ اور ڈیٹا بنڈلز کی تفصیلات ایک ہی پلیٹ فارم پر فراہم کر دی گئی ہیں۔ اس کے ساتھ ہر کمپنی کی تازہ ترین ٹیرف شیٹس بھی ویب سائٹ پر دستیاب ہیں۔

پی ٹی اے کے مطابق صارفین اب مختلف پیکیجز کی سہ ماہی قیمتوں، سالانہ قیمتوں میں تبدیلی کی شرح، پیکیج کی مدت اور متعلقہ کمپنیوں کی جانب سے دی جانے والی سہولتوں کا بآسانی موازنہ کر سکتے ہیں۔حکام کا کہنا ہے کہ اس اقدام کا مقصد صارفین کو درست، شفاف اور بروقت معلومات فراہم کرنا ہے تاکہ وہ اپنی ضرورت اور بجٹ کے مطابق بہترین موبائل پیکیج کا انتخاب کر سکیں۔