اسلام آباد (نیوز ڈ یسک) سندھ میں موسمِ گرما کی تعطیلات اپنے اختتامی مرحلے میں داخل ہو چکی ہیں،
جس کے ساتھ ہی والدین، طلبہ اور اساتذہ کے درمیان یہ سوال گردش کر رہا ہے کہ آیا تعلیمی ادارے یکم اگست سے معمول کے مطابق کھلیں گے یا شدید گرمی کے باعث تعطیلات میں اضافہ کیا جائے گا۔صوبائی حکومت نے پہلے ہی سرکاری اور نجی اسکولوں کے لیے یکم جون سے 31 جولائی 2026 تک موسمِ گرما کی چھٹیوں کا اعلان کیا تھا، جبکہ نئے تعلیمی سال 2026-27 کے آغاز کی تاریخ یکم اگست مقرر کی گئی ہے۔دوسری جانب محکمہ موسمیات کی پیش گوئی کے مطابق اگست کے دوران سندھ کے مختلف علاقوں میں گرمی اور حبس کی شدت برقرار رہنے کا امکان ہے۔ خاص طور پر کراچی اور دیگر ساحلی علاقوں میں نمی کے زیادہ تناسب کی وجہ سے موسم مزید گرم محسوس ہونے کی توقع ظاہر کی جا رہی ہے۔ماہرین موسمیات نے یہ بھی امکان ظاہر کیا ہے کہ مون سون بارشوں کا سلسلہ بھی جاری رہ سکتا ہے،
جس کے باعث مختلف شہروں میں آمدورفت اور تعلیمی سرگرمیوں کو مشکلات کا سامنا کرنا پڑ سکتا ہے۔تاہم تعطیلات میں ممکنہ توسیع کے حوالے سے محکمہ تعلیم سندھ کی جانب سے تاحال کوئی باضابطہ اعلان یا نوٹیفکیشن جاری نہیں کیا گیا۔ موجودہ صورتحال کے مطابق تعلیمی ادارے یکم اگست سے ہی کھلنے کا امکان ہے کیونکہ حکام نے شیڈول میں کسی قسم کی تبدیلی کا عندیہ نہیں دیا۔یاد رہے کہ گزشتہ برس بھی حکومت سندھ نے موسمِ گرما کی تعطیلات میں توسیع نہیں کی تھی اور تعلیمی سرگرمیاں طے شدہ تعلیمی کیلنڈر کے مطابق دوبارہ شروع کی گئی تھیں۔اب والدین اور طلبہ کو صوبائی حکومت کے آئندہ فیصلے کا انتظار ہے کہ آیا موسمی حالات کے پیش نظر اسکول کھولنے کی تاریخ میں کوئی تبدیلی کی جاتی ہے یا موجودہ شیڈول ہی برقرار رکھا جاتا ہے۔
