لاہور(این این آئی)پاکستان مسلم لیگ (ن) کی مرکزی نائب صدر مریم نواز کوٹ لکھپت جیل میں اپنے والد اور پارٹی قائد محمد نواز شریف سے ہونے والی ملاقات میں ورکر زکنونشنز کے حتمی شیڈول سے آگاہ اور ان سے رہنمائی بھی لیں گی۔ ذرائع کے مطابق مریم نواز نے عوامی رابطہ مہم کے حوالے سے پارٹی رہنماؤں سے مشاورت کر کے اس کا شیڈول تیار کر لیا ہے

جس کی حتمی منظور جمعرا ت کے روز اپنے والد اور پارٹی قائد محمد نواز شریف سے ہونے والی ملاقات میں لیں گی۔ ذرائع کے مطابق نواز شریف کی اجازت کے بعد مقامی سطح پر رہنماؤں کو تیاریوں کیلئے باضابطہ ہدایت جاری کر دی جائے گی۔علاوہ ازیں مسلم لیگ (ن) کی نائب صدر مریم نواز 7 جولائی کو منڈی بہاؤالدین میں احتجاجی جلسہ سے خطاب کریں گی۔مسلم لیگ (ن)کے رہنما کیپٹن (ر) صفدر نے کہا کہ الیکشن میں پورے ملک میں دھاندلی ہوئی نتائج بدلے گئے، آج ملک خطرات میں ہے تو طاہرالقادری سکون سے باہر بیٹھا ہے، نوازشریف اپنی بیٹی کو لیکر آئین کی بالا دستی کیلئے اڈیالہ جیل گئے۔انہوں نے کہاکہ عمران حکومت کے بجٹ نے عوام کا سکون چھین لیا ہے، آج ہم نہ نکلے تو پاکستان کی سالمیت کو خطرہ ہے، پاکستان کے آئین، پاکستان کے نظریے اور سرحدوں کو خطرہ ہے، 22 کروڑ عوام کو مریم نواز کے ساتھ نکلنا ہو گا تبھی پاکستان کو بچایا جا سکتا ہے، مریم نواز نے ہتھکڑیاں پہننے کیلئے چوڑیاں پہننا چھوڑ دیاہے۔کیپٹن (ر) صفدر کے مطابق پاکستان کو نواز شریف نے ایٹمی ملک بنایا، اس بجٹ کو نامنظور کرنے کا نعرہ عوام میں سے اٹھے گا، ملک کو ایتھوپیا اور صومالیہ بنایا جا رہا ہے، نواز شریف کو ووٹ کو عزت دینے کے نعرے کی پاداش میں جیل میں ڈالا گیا ہے، ہرشہری 7جولائی کے جلسہ میں شرکت کے لیے گھر سے نکلے اور پاکستان کو بچالے۔