کراچی(این این آئی)سول ایوی ایشن ڈویژن نے تمام ایئرپورٹس پر سیکیورٹی سے متعلق اہم اقدامات کرتے ہوئے بیرون ملک جانے والے مسافروں کے سامان کو پلاسٹک ریپنگ کرانا لازمی قرار دے دیا ہے۔ذرائع کے مطابق بغیر پلاسٹک ریپنگ کے سفری بیگ لیجانے کی اجازت نہیں ہوگی جبکہ ایئرپورٹس پر سامان کی ریپنگ کیلئے مزید مشینیں لگانے کی ہدایت کی گئی ہے۔سول ایوی ایشن اتھارٹی حکام کے مطابق انٹرنیشنل ایئر پورٹس پر ایک سے زائد
ریپنگ مشینیں نصب کی جائیں ، ریپنگ مشین کیلئے ٹینڈر جاری کردیئے ہیں، ریپنگ سے بیگوں میں سے چوری کے واقعات کی روک تھام ہوگی۔سی اے اے ذرائع کے مطابق اسلام آباد، کراچی، پشاور، لاہور، کوئٹہ ایئرپورٹس پرمشینیں نصب ہوں گی ، مشینوں کوایئرپورٹس پرایک ماہ کے اندر نصب کیا جائیگا۔سول ایوی ایشن اتھارٹی کے مطابق مسافروں کوسامان کی ریپنگ پرعملدرآمدآئندہ ماہ سے شروع ہوگا، بغیر ریپنگ کے مسافروں کاسامان جہاز میں منتقل نہیں کیاجائے گا۔
