لندن(این این آئی)کرکٹ کا سب سے بڑا میلہ کرکٹ ورلڈکپ انگلینڈ میں شروع ہوگیا ہے جس کے لیے تمام 10 ٹیمیں تیار میدان میں اترنے کیلئے بے چین ہیں ۔سابق آف اسپنر سعید اجمل نے قومی ٹیم کو مشورہ دیتے ہوئے کہا کہ فاسٹ بولروں کو ریورس سوئنگ اور پیس کے ساتھ بولنگ کرنا ہو گی جبکہ بیٹنگ کے شعبے میں آصف علی کی صورت میں جارحانہ مزاج بیٹسمین مل گیا ہے۔سابق کپتان سلمان بٹ کا کہنا ہے کہ آن پیپر پاکستان ویسٹ انڈیز سے بہتر ٹیم ہے، آسٹریلیا اور انگلینڈ سے سیریز ہارنا پاکستان کے لیے نقصان دہ رہا۔
سابق لیگ اسپنر عبدالرحمان نے قومی ٹیم کو خبردار کیا ہے کہ ورلڈ کپ میں پاکستان کے لیے پہلا میچ جیتنا ضروری ہے، کرس گیل اور آندرے رسل پاکستان کے خلاف میچ میں فرق ڈال سکتے ہیں۔فاسٹ بولر اعزاز چیمہ نے کہاکہ وہاب ریاض اور محمد عامر کی شمولیت سے قومی ٹیم میں توازن پیدا ہوا ہے۔بلے باز بلال آصف نے کہاکہ قومی ٹیم نے گزشتہ میچوں میں جو غلطیاں کی اس سے یقینا سیکھنے کا موقع ملا ہوگا جبکہ احسان عادل کا کہنا ہے کہ پاکستان ٹیم بہتر ہے اور امید ہے ویسٹ انڈیز کے خلاف اچھا مقابلہ ہوگا۔
