اسلام آباد(اے این این ) وفاقی وزیر برائے سائنس و ٹیکنالوجی فواد چوہدری پر بننے والے میمز وزیراعظم عمران خان بھی فارورڈ کرنے لگے ہیں۔حسِ مزاح کو سیاسی مخالفین پر استعمال کرنے والے فواد چوہدری سوشل میڈیا پر خود مذاق بن گئے ہیں۔وزیر سائنس و ٹیکنالوجی بننے کے بعد فواد چوہدری کے میمز اتنے مقبول ہوئے کہ وزیر اعظم بھی فارورڈ کیے بغیر نہیں رہ سکے ہیں۔

فواد چوہدری کا ایک پروگرام میں کہنا تھا کہ وزیراعظم عمران خان نے ایک میم بھیجی ہے جس میں لکھا ہے کہ ’شادی بچوں کا کھیل نہیں لیکن کھیلا بچوں کیلئے جاتا ہے‘۔ان دنوں ڈالر کی قدر میں اضافہ کی وجہ اور اس کی اڑان کو روکنے سے متعلق فواد چوہدری کے میمز ہٹ ہیں۔سوشل میڈیا کے میمز میں وزیر سائنس و ٹیکنالوجی کو بچوں کی بنیاد مضبوط کرنے کے طریقے بتاتے ہوئے بھی دکھایا گیا ہے، تو کہیں انہیں آسمانی بجلی چمکنے کی وجہ بتاتے ہوئے دیکھا جاسکتا ہے۔ان دنوں میں گرمی اور روزوں سے متعلق فواد چوہدری کے میمز بھی ہٹ ہیں، مزیدار بات یہ ہے کہ فواد چوہدری خود بھی ان میمز کو خوب انجوائے کرتے ہیں۔فواد چوہدری سب سے زیادہ مذاق اس وقت بنے جب انہوں نے وزیر سائنس و ٹیکنالوجی کا عہدہ سنبھالنے کے بعد اپنے انٹرویو میں ناسا کی دوربین ہبل کو پاکستانی دوربین قرار دیا تھا۔سائنس و ٹیکنالوجی میں فواد چوہدری کی چھیڑ چھاڑ تو اس وقت بھی جاری تھی جب یہ وزارت ان کے پاس نہیں آئی تھی اور وہ تھا فواد چوہدری کا وہ شہرہ آفاق بیان جس میں انہوں نے ہیلی کاپٹر کا فی کلومیٹر خرچ 55 روپے 74 پیسے بتایا تھا۔فواد چوہدری کا کہنا ہیے کہ روزانہ ہی مزاح سے بھرپور میمز آتی ہیں جو میں خود اکثر لوگوں کو فارورڈ کردیتا ہوں، اپنے میمز سے خوب لطف اندوز ہوتا ہوں۔