لودھراں(آن لائن) گذشتہ روز بیل گاڑی پر بجلی کا تار گرنے سے چار افراد کے جاں بحق ہونے کی خبر سن کر بچوں کا دادا بھی انتقال کرگیا ہے۔تفصیلات کے مطابق گذشتہ روز صوبہ پنجاب کے ضلع لودھراں میں اندوہناک واقعہ پیش آیا تھا، جہاں بجلی کا تار ٹوٹ کر بیل گاڑی پر گرنے سے چار افراد موقع پر ہی جاں بحق ہوگئے تھے۔جاں بحق ہونے والوں میں میاں بیوی اور دو بچے شامل تھے۔
اس اندوہناک واقعے کے بعد جب لاشیں گھر پہنچی تو بچوں کا دادا اولاد کی موت کا صدمہ نہ برداشت کرسکا اور ہارٹ اٹیک کے باعث خالق حقیقی سے جاملا۔ایک ہی گھر کے پانچ افراد کی موت پر اہل علاقہ نے شدید احتجاج کیا اور نااہلی اور غفلت پر واپڈا افسران کیخلاف تھانہ دھنوٹ میں مقدمہ درج کرایا ہے، جس میں ایکسیئن واپڈا،ایس ڈی او،لائن سپرٹنڈنٹ اور لائن مین کو نامزد کیا گیا ہے۔
