اسلام آباد(این این آئی)سابق لیگی رکن قومی اسمبلی شکیل اعوان نے وفاقی وزیر ریلوے شیخ رشید کو مناظرے کا چیلنج دیتے ہوئے کہا ہے کہ راولپنڈی میں زچہ و بچہ ہسپتال کیلئے فنڈز مسلم لیگ ن کی حکومت نے جاری کئے،منصوبہ سے میاں نواز شریف کے نام کی تختیاں اتار کر عمران خان اپنی تختیاں لگارہے ہیں۔ جمعہ کو ایک بیان میں انہوںنے کہاکہ
عمران خان اور شیخ رشید رالپنڈی میں جس ہسپتال کا افتتاح کررہے ہیں اسکی بنیاد میاں نواز شریف نے رکھی تھی۔انہوںنے کہاکہ راولپنڈی میں زچہ و بچہ ہسپتال کیلئے فنڈز مسلم لیگ ن کی حکومت نے جاری کئے۔انہوںنے کہاکہ میاں نواز شریف نے 5 ارب 30 کروڑ روپے کا اس منصوبہ کی منظوری دی تھی۔انہوںنے کہاکہ مارچ 2018 کو شاہد خاقان عباسی کی حکومت نے یہ رقم جاری کی۔شکیل اعوان نے کہاکہ سال 2019 کیلئے اس ہسپتال کے لئے 1 ارب مختص کیا گیا تھا۔انہوںنے کہاکہ منصوبہ سے میاں نواز شریف کے نام کی تختیاں اتار کر عمران خان اپنی تختیاں لگارہے ہیں۔شکیل اعوان نے کہاکہ شہر کے سب سے بڑے جھوٹے شیخ رشید ہیں۔انہوںنے کہاکہ راولپنڈی شہر گواہ ہے کہ یہ پیسہ ہم ہسپتال کے لئے لیکر آئے۔انہوںنے کہاکہ آج ایک اور جعل سازی کا افتتاح عمران خان کرنے جارہے ہیں۔انہوںنے کہاکہ آپ کو معلوم ہے کہ آپکے پاس تختیوں پر تختیاں لگانے کے علاوہ کوئی کام نہیں۔انہوںنے کہاکہ آپ 9 ماہ میں کوئی ایک منصوبہ بتائیں جو اٰپ نے شروع کیا ہو۔شکیل اعوان نے کہاکہ شیخ رشید کو چیلنج کرتا ہوں اس منصوبے پر مجھ سے مناظر کرلیں۔انہوںنے کہاکہ میرے پاس تمام ثبوت موجود ہیں ہر بات ثابت کروں گا۔
