ملتان (این این آئی)ملتان میں ڈائیریا کے مریضوں میں اضافہ ہوگیا،وباء تیزی سے پھیلنے کا خدشہ ہے۔ ہسپتال ذرائع کے مطابق چلڈرن ہسپتال ملتان میں میں روزانہ ڈائیریا سے متاثرہ لگ بھگ چھ سو سے سات سو بچے لائے جارہے ہیں،بچوں کے علاوہ بڑوں میں بھی ڈائیریا اور اسہال کی شکایات عام ہور ہی ہیں۔ سرکاری ہسپتالوں کے علاوہ پرائیوٹ ہسپتالوں میں بھی مریض آرہے ہیں۔ ڈاکٹرزنے مشورہ دیاہے کہ شہری پانی ابال کرپیئیں اورباہر کی چیز کم کھائیں۔ڈاکٹرزنے شہریوں کوگرمی سے بچنے کامشورہ بھی دیاہے۔ڈاکٹروں نے

والدین کو بچوں کے کھانے پینے میں احیتاطی تدابیر اختیار کرنے کا مشورہ دیا ہے۔ یاد رہے قومی ادارہ صحت نے موسمی بیماریوں سے آگاہی سے متعلق گزشتہ دنوں  انتباہی مراسلہ بھی جاری کیاہے۔این آئی ایچ کے 44ویں سہ ماہی مراسلے میں بتایا گیا کہ وبائی امراض کا براہ راست تعلق موسم سے ہے جس میں چکن گونیا، اسہال، کانگو بخار، ڈینگی بخار، لیشمینیا، خسرہ، کالی کھانسی، پولیو، ٹائیفائیڈ اور نیگلیریا شامل ہیں۔قومی ادارہ صحت کی جانب سے حکام اور متعلقہ اداروں کو احتیاطی اقدامات کے بارے میں آگاہ کیا گیا۔