لاہور ( این این آئی)وزیر اعلیٰ پنجاب کی ہدایت پر رمضان المبارک سے قبل ملاوٹ مافیا کے خلاف بڑا آپریشن کرتے ہوئے مضر صحت جوس اور پلپ تیار کرنیوالی 3 جوس فیکٹریاں سیل کر کے مشینری اور سامان ضبط کر لیا گیا جبکہ 16 ہزار کلو پلپ،11ہزار لیٹر تیار مشروبات،2 ہزار لیٹر کیمیکلز

اور فلیورز برآمد کر لیے گئے۔ ڈی جی فوڈ اتھارٹی کیپٹن (ر) محمد عثمان کی سربراہی میں لاہور اور ساہیوال کے مضافات میں کاروائیاں کی گئیں۔لاہور میں کوٹ عبدالمالک کے قریب کاشف جوس فیکٹری کو سر بمہر کیا گیا، ساہیوال میں ندیم جوس اور آفتاب جوس یونٹ کو سیل کیا گیا، جوس کی تیاری میں کھلے رنگوں، کیمیکلز اور زائدالمیعاد فلیورز کا استعمال کیا جارہا تھا۔ڈی جی فوڈ اتھارٹی نے کہا کہ جوسز پر غلط لیبلنگ، فوڈ لائسنس، ملازمین کے میڈیکلز کی عدم موجودگی پر کاروائی کی گئی، ناقص اور مضر صحت جوسز کی بڑی سپلائی رمضان المبارک کے لیے تیار کی جا رہی تھی۔کیپٹن (ر) محمد عثمان نے کہا کہ وزیراعلیٰ پنجاب کی ہدایت پر صوبہ بھر میں ملاوٹ مافیا کے خلاف کارروائیاں جاری ہیں، عوام سے گزارش ہے کہ اپنے گردونواح میں نظر رکھیں اور ملاوٹ دیکھتے ہی ہمیں اطلاع دیں،اطلاع بذریعہ ہیلپ لائن، فیس بک، موبائل اپلیکیشن یا ویب سائٹ درج کروائی جا سکتی ہے۔ملاوٹ سے پاک پنجاب کے خواب کی تکمیل کیلئے ہر ممکن وسائل بروئے کار لائے جا رہے ہیں۔