کراچی (نیوزڈیسک)کراچی واٹر اینڈ سیوریج بورڈ کے تحت شروع کئے جانے والے پہلے واٹر ٹریٹمنٹ پلانٹ کی زمین پر نامعلوم افراد قبضے کی کوششیں کر رہے ہیں، جس میں انہیں پولیس کی حمایت بھی حاصل ہے۔ ذرائع کا کہنا ہے کہ نیشنل اسٹیڈیم کراچی کے قریب کے ڈی اے آفیسر سوسائٹی میں واقع واٹر بورڈ کے واٹر ٹریٹمنٹ پلانٹ کی زمین پر نامعلوم افراد نے دیوار کھڑی کر دی ہے۔ مذکورہ پلانٹ شہر میں واٹر بورڈ کا پہلا ٹریٹمنٹ پلانٹ ہے۔ ذرائع کے مطابق قبضہ مافیا پولیس کی نگرانی میں زمین پر قبضہ جمانے کی کوشش کر رہا ہے۔ قبضے کی زمین پر دیوار کی تعمیر کے موقع پر پولیس موبائل بھی دیکھی گئی۔ ذرائع کا مزید کہنا ہے کہ واٹر بورڈ کی زمین کا معاملہ چند سالوں سے عدالت میں ہے۔ اس سے پہلے بھی مذکورہ زمین پر کئی دفعہ قبضے کی کوششیں کی جا چکی ہیں۔