لاہور(نیوزڈیسک)پاکستان مسلم لیگ(ن) کے رکن قومی اسمبلی حمزہ شہباز شریف نے ایک طرف ایٹمی دھماکوں کی قوم کو مبارکباد دی اور نواز شریف کی جرات کو سلام کیا تو ساتھ ساتھ ہی تحریک انصاف کو آڑے ہاتھوں لیا۔ ایوان اقبال میں یوم تکبیر کی تقریب سے خطاب میں حمزہ شہباز کا کہنا تھا کہ دھرنے والوں نے چھ ماہ ضائع کیے مگر تحریک انصاف کی منفی سیاست پر نواز شریف نے صبر کا مظاہرہ کیا۔ تحریک انصاف کے دھرنے میں کس کو گالی نہیں دی گئی اور کس کی پگڑی نہیں اچھالی گئی۔ حمزہ شہباز شریف کا کہنا تھا کہ اقتصادی راہداری کا منصوبہ پاکستان میں ترقی کا انقلاب لائے گا یہ منصوبہ چین کے ساتھ چاروں صوبوں کو ملائے گا اس سے پاکستان کی تقدیر بدلے گی۔ اس منصوبے کو کسی سیاست کی نذر نہیں ہونے دیں گے پہلے کالا باغ ڈیم کو سیاست کی نذر کیا گیا مگر اقتصادی راہداری کے منصوبے کو متنازعہ نہیں بننے دیں گے ۔