کینبرا (این این آئی)آسٹریلیا نے آئی سی سی ورلڈ کپ کیلئے 15رکنی ٹیم کا اعلان کر دیا ہے ، اسٹیون اسمتھ اور ڈیوڈ وارنر کی بال ٹیمپرنگ تنازع میں پابندی کی سزا کاٹنے کے بعد واپسی ہوئی ہے۔تفصیلات کے مطابق30مئی سے 14جولائی تک انگلینڈ میں کھیلے جارہے ورلڈ کپ کیلئے

نیوزی لینڈ کے بعد آسٹریلیا دوسرا ملک ہے جس نے میگا ایونٹ کیلئے اپنے حتمی اسکواڈ کا اعلان کیا ۔ اوپنر ایرون فنچ کو کپتان برقرار رکھا گیا ہے جبکہ سابق کپتان اسٹیون اسمتھ اور ڈیوڈ وارنر بال ٹیمپرنگ تنازع میں ایک سالہ پابندی کی سزا کاٹنے کے بعد ٹیم میں واپس آ گئے ہیں۔5فاسٹ بولرز پر مشتمل مضبوط کینگروز میگا ایونٹ میں اپنا پہلا میچ یکم جون کو افغانستان کے خلاف کھیلیں گے۔ پانچ فاسٹ بولرز پیٹ کمنز ، مچل اسٹارک ، جے رچرڈسن ، کولٹر نائل اور بہرینڈوف منتخب کئے گئے ہیں۔ اسکواڈ میں دو اسپنرز نیتھن لائن اور ایڈم زمپا شامل کئے گئے ہیں جبکہ دیگر کھلاڑیوں میں ایرون فنچ، ڈیوڈ وارنر، عثمان خواجہ، شان مارش ، اسٹیو اسمتھ، گلین میکسویل، مارکوس اسٹوئنز اور وکٹ کیپر ایلکس کیری شامل ہیں۔یاد رہے کہ گزشتہ ہفتے ورلڈکپ 2019کے لیے آسٹریلیا کی جانب سے پہنے جانے والی کٹ سامنے آئی تھی۔ کٹ میں روایتی پیلے رنگ میں ہرے رنگ کو شامل کیا گیا۔

موضوعات:آسٹریلوی سکواڈ