اسلام آباد(این این آئی)انٹرنیشنل کرکٹ کونسل (آئی سی سی) کرکٹ ورلڈ کپ ٹرافی پاکستان میں نمائش کیلئے اسلام آباد پہنچا دی گئی جسے ملک بھر میں لے جایا جائیگا۔ جمعرات کو قومی کرکٹ ٹیم کے کپتان سرفراز احمد ورلڈ کپ ٹرافی کے ہمراہ

دبئی سے ایمریٹس ائیر لائینز کی پرواز EK۔612 سے اسلام آباد پہنچے۔آئی سی سی ورلڈ کپ ٹرافی کی نمائشی تقریب (آج) جمعہ کو اسلام آباد میں ہوگی جس کے بعد اسے 13 اپریل کو لاہور اور 14 اپریل کو کراچی لے جایا جائے گا،ٹرافی کو پاکستان کے چاروں صوبوں میں لے جایا جائے گا۔ ورلڈ کپ ٹرافی کی نمائش کے موقع پر شہری اس کے ساتھ تصاویر اور سیلفیز بھی بنا سکیں گے۔ 14 اپریل کو کراچی میں عظیم الشان جشن منایا جائیگا، کنسرٹ کیساتھ آتش بازی بھی ہو گی۔دریں اثناء قومی کرکٹ ٹیم کے کپتان سرفراز احمد نے کہاہے کہ انشاء اللہ ورلڈ کپ جیت کر ٹرافی کو واپس پاکستان ہی لایا جائیگا ۔ جمعرات کو یہاں میڈیا سے گفتگو کرتے ہوئے کپتان سرفراز احمد نے کہاکہ انشاء اللہ ورلڈکپ جیت کر ٹرافی کو واپس پاکستان ہی لایا جائے گا۔انہوں نے کہا کہ 10 سال بعد پاکستان میں بین الاقوامی کرکٹ کی بحالی ہوئی ہے جس پر سب کو مبارکباد پیش کرتا ہوں اور اس میں پاک فوج کا نمایاں کردار ہے۔انہوں نے کہاکہ 14 اپریل کو کراچی میں عظیم الشان جشن منایا جائے گا جس میں کرکٹرز بھی شریک ہوں گے ۔انہوں نے کہاکہ آئی سی سی کرکٹ ورلڈ کپ ٹرافی پاکستان آئی ہے ۔ سرفرازاحمد نے کہاکہ ٹرافی پاکستان کے چاروں صوبوں میں جائے گی۔انہوں نے کہاکہ انشاء اللہ ٹیم ورلڈ کپ جیت کر واپس پاکستان ہی آئیگی۔ انہوں نے کہاکہ کرکٹ پاکستان کا پسندیدہ کھیل ہے۔یاد رہے کہ ورلڈ کپ 2019 کا آغاز 30 مئی سے ہوگا اور ایونٹ کا افتتاحی میچ میزبان انگلینڈ اور جنوبی افریقا کے درمیان کھیلا جائے گا۔