کرائسٹ چرچ(اے این این)نیوزی لینڈ میں کرائسٹ چرچ حملے میں ملوث دہشت گرد کو(آج) پانچ اپریل کو عدالت میں پیش کیا جائے گا، پولیس کے مطابق اس پر 50 قتل اور 39 اقدام ِ قتل کے چارجز لگائے جائیں گے۔نیوزی لینڈ کی پولیس نے کہا ہے کہ جب پانچ اپریل کو کرائسٹ چرچ شہر کی دو مساجد پر فائرنگ کرنے والے ملزم کو عدالت میں پیش کیا جائے گاتو اس پر پچاس قتل کرنے کے الزامات کی فرد جرم عائد کی جائے گی۔ پندرہ مارچ کے روز
کیے گئے دہشت گردانہ حملے کا ملزم ایک سفید فام نسل پرست آسٹریلوی شہری ہے۔ اسے گرفتاری کے اگلے دن عدالت میں پیش کیا گیا تھا اور تب عدالت نے اس کو ریمانڈ پر پولیس کی تحویل میں دیتے ہوئے اگلی پیشی پانچ اپریل مقرر کی تھی۔ پہلی پیشی پر ملزم پر ایک قتل کا الزام عائد کیا گیا تھا۔ نیوزی لینڈ کی پولیس کے مطابق استغاثہ ملزم پر مزید دیگر الزامات عائد کرنے پر غور و خوص بھی جاری رکھے ہوئے ہے۔
