بغداد(این این آئی)امریکا کی قیادت میں دہشت گردی کیخلاف سرگرم بین الاقوامی عسکری اتحاد نے شدت پسند تنظیم داعش کے سربراہ ابو بکر البغدادی کی زندہ یا مردہ گرفتاری میں مدد فراہم کرنے یا اس کے بارے میں معلومات فراہم کرنے پر2.5کروڑ ڈالر کا انعام مقرر کردیا۔میڈیارپورٹس کے مطابق عراق کے شہر الرمادی میں اتحادی فوج نے طیاروں کی مدد سے شہری آبادی میں پمفلٹ گرائے جن میں شہریوں سے البغدادی کے بارے میں معلومات فراہم کرنے کوکہا گیا ۔ ان پمفلٹس پر البغدادی کے سرکی قیمت 2.5کروڑ ڈالر مقرر کی گئی ہے۔الرمادی
شہر کی پولیس کاکہنا تھا کہ اتحادی طیاروں نے الرمادی میں پمفلٹ گرائے جن میں مقامی آبادی کو داعش کے سربراہ کے بارے میں معلومات فراہم کرنے کی ترغیب دی گئی ہے۔عراق میں گرائے گئے پمفلٹس میں شہریوں کو مخاطب کرکے کہا گیا کہ داعش کے سربراہ نے البغدادی نے آپ لوگوں کے خلاف جنگ کی، آپ کی اراضی غصب کی اور تمہاری اہل خانہ کو قتل کیا۔ وہ اپنی تباہی اور موت سے بچنے کے لیے چھپتا پھر رہاہے۔ آپ اس کے بارے میں درست معلومات دے کر اس کے ہاتھوں ہونے والی تباہی اور بربادی کا انتقام لے سکتے ہیں۔
