لاہور ( این این آئی) حکومت نے ’’نیا پاکستان ہاؤسنگ پروگرام ‘‘کے تحت فوج اور پولیس کے شہداء کے خاندانوں کو محدود مفت گھر دینے کا فیصلہ کر لیا ،لودھراں اور رینالہ خورد میں شہدا کی فیملیز کو بیس بیس گھر مفت دیئے جائیں گے،
حکومت نے تمام متعلقہ اضلاع میں شہدا کے خاندانوں کو درخواستیں دینے کی ہدایت کر دی ہے۔وزیر ہاؤسنگ پنجاب میاں محمود الرشید نے بتایا ہے کہ لودھراں اور رینالہ خورد میں نیا پاکستان ہاؤسنگ سکیم کی کم لاگت کے گھروں کے حصول کیلئے درخواست فارم جمع کروانے کی تاریخ میں یکم اپریل 2019ء (سوموار) تک توسیع کر دی گئی ہے ۔جمعتہ المبارک کو لودھراں اور رینالہ خورد ، ضلع اوکاڑہ میں نیا پاکستان ہاؤسنگ سکیم کے تحت عوام کی ایک بڑی تعداد نے درخواستیں جمع کروائیں لہذا ہفتہ اور اتوار کو بینک کی تعطیل کے پیش نظر فیصلہ کیا گیا ہے کہ ان اضلاع میں درخواست فارم یکم اپریل تک وصول کیے جائیں گے ۔ انہو ں نے مزید کہاکہ پولیس اورفوج کے شہدا کی بیوگان کو لودھراں اور رینالہ خورد سکیم میں بیس بیس مکانات بلامعاوضہ فراہم کیے جائیں گے اور اس ضمن میں درخواستیں بھی یکم اپریل تک وصول کی جائیں گی ۔ واضح رہے کہ قبل ازیں اس حوالے سے درخواست فرام جمع کروانے کی تاریخ 31مارچ تھی ۔
