لاہور(این این آئی) وزارت داخلہ نے نیشنل ایکشن پلان پر عملدآمد کے حوالے سے سوشل میڈیا سے متعلق رپورٹ تیار کرلی جس کے مطابق ایک ہفتے میں کالعدم تنظیموں کے 150افراد کو حراست میں لے لیا گیا۔ محکمہ داخلہ ذرائع کے مطابق سکیورٹی اداروں نے جنوبی پنجاب سمیت صوبہ بھر میں کارروائیاں کیں، کارروائیوں کے دوران ریاست مخالفت، فرقہ واریت پھیلانے والوں کے خلاف ایکشن میں مزید تیزی لائی گئی۔ اس دوران 2018ء سے اب تک 4ہزار 566ویب سائٹس

بلاک کی گئیں، 2019میں 3ہزار سے زائد فیس بک اکاؤنٹس بلاک کئے گئے جبکہ پنجاب حکومت کی جانب سے مزید 277اکاؤنٹس کی نشاندہی کی گئی ہے، یہ اکاونٹس اور بلاگس ریاست مخالف ایجنڈے کو پھیلا رہے تھے، 100 سے زائد ویب سائٹس بیرون ممالک سے چلائی جارہی تھیں،بیرون ممالک سے چلنے والے اکاؤنٹس ملک دشمن ایجنڈے پر عمل پیرا تھے، محکمہ داخلہ کے مطابق پی ٹی اے کو رپورٹ بھجوائی گئی، جس پر سائٹس اور اکاؤنٹس بلاک کئے گئے۔