اسلام آباد (این این آئی)پاک فضائیہ نےJF۔17 تھنڈر طیارے سے طویل فاصلے تک مارکرنے والے ملکی ساختہ میزائل کا کامیاب تجربہ کیا ہے ، سربراہ پاک فضائیہ ایئر چیف مارشل مجاہد انور خان نے سائنسدانوں اور انجینئرز کو مبارکباددیتے ہوئے کہا ہے کہ پاکستان امن پسند ملک ہے تاہم دشمن کی جارحیت کی صورت میں بھرپور جواب دینے کیلئے تیار ہیں۔ منگل کو پاک فضائیہ نے جے ایف 17تھنڈر ملٹی رول لڑاکاطیارے سے طویل فاصلے تک مار کرنے والے ملکی ساختہ میزائل کا کامیاب تجربہ کر لیا۔ ترجمان پاک فضائیہ کے مطابق ملکی دفاع میں ایک عظیم سنگِ میل کی حیثیت کاحامل یہ

تجربہ قابلِ فخر پاکستانی سائنسدانوں اور انجینئرز کی صلاحیتوں کا منہ بولتا ثبوت ہے جنہوں نے JF۔17تھنڈر کو ملکی سطح پر تیار کردہ اس جدید میزائل سے لیس کر دیا ہے، اس کامیاب تجربے سے JF۔17تھنڈر کو دن اور رات میں طویل فاصلے کے اہداف کو ٹھیک ٹھیک نشانہ بنانے کی صلاحیت حاصل ہو گئی ہے۔سربراہ پاک فضائیہ اییر چیف مارشل مجاہد انور خان نے پاکستانی سائنسدانو ں اور پاک فضائیہ کو اس عظیم کامیابی پر مبارکباد پیش کی ہے۔انہوں نے کہا کہ پاکستان ایک امن پسند ملک ہے لیکن اگر دشمن نے ہم پر جارحیت مسلط کی تو ہم اس کا بھر پور جواب دیں گے۔