اسلام آباد (این این آئی)لکسمبرگ کے وزیرخارجہ جین ایز لبورن نے کہا ہے کہ پاکستان اور بھارت کے درمیان کشیدگی پرتشویش ہے، دونوں ممالک کے درمیان کشیدگی کسی کے حق میں نہیں،کشیدگی کم کرنے کیلئے یورپی یونین کردار ادا کر رہی ہے،لکسمبرگ پاکستان اور بھارت کے درمیان ثالث بننے کو تیار ہے،چاہتے ہیں کہ افغانستان کا مسئلہ مذاکرات سے جلد حل ہو، افغانستان میں امن سے پورے خطے میں استحکام ہوگا۔
جمعرات کو وزیر خارجہ شاہ محمود قریشی اور لکسمبرگ کے وزیر خارجہ جین ایزلبورن مشترکہ پریس کانفرنس کررہے تھے۔ اس دوران لگسمبرگ کے وزیرخارجہ جین ایزلبورن نے کہا کہ پاکستان اور بھارت کے درمیان کشیدگی پرتشویش ہے۔انہوں نے کہا کہ دونوں ممالک کے درمیان کشیدگی کسی کے حق میں نہیں، کشیدگی کم کرنے کیلئے یورپی یونین کردار ادا کر رہی ہے۔وزیرخارجہ جین ایزلبورن نے کہا کہ لکسمبرگ پاکستان اور بھارت کے درمیان ثالث بننے کو تیار ہے۔انہوں نے کہاکہ یورپی یونین کو احساس ہے پاکستان میں دہشت گردی، نفرت کا نشانہ خود مسلمان بنتے آئے ہیں، پاکستان اور یورپی یونین میں سمٹ سطح پر مذاکرات سے متعلق بھی بات ہوئی جس میں تجارت، سرمایہ کاری کے شعبوں میں تعاون بڑھانے پر اتفاق کیا گیا،پاکستان کے ساتھ ماضی میں بھی اظہار یکجہتی کیا ہے، یورپی یونین کوخدشہ ہے پاکستان میں اقلیتوں کیلئے جگہ کم ہورہی ہے۔لکسمبرگ کے وزیرخارجہ نے کہاکہ وزیراعظم عمران خان کے کشیدگی میں کمی کے اقدامات کا خیر مقدم کرتے ہیں اور بھارتی پائلٹ کی واپسی پر وزیراعظم عمران خان کا شکریہ ادا کرتے ہیں ۔لکسمبرگ کے وزیرخارجہ نے کہا کہ خطے میں امن و استحکام چاہتے ہیں، چاہتے ہیں کہ افغانستان کا مسئلہ مذاکرات سے جلد حل ہو، افغانستان میں امن سے پورے خطے میں استحکام ہوگا، افغانستان میں امن کیلئے پاکستان کے کردار کو سراہتے ہیں ،پاکستان کیلئے افغانستان میں اپنا اثرورسوخ استعمال کرنے کا یہ بہترین موقع ہے۔
اس موقع پر وزیرخارجہ شاہ محمود قریشی نے کہاکہ لکسمبرگ سے توانائی،مواصلات اور دیگر شعبوں میں تعاون پر بات چیت ہوئی، یورپی یونین کے ساتھ تعلقات کو مزید وسعت دینا چاہتے ہیں، لکسمبرگ کے وزیرخارجہ سے خطے کی صورتحال پر بات چیت ہوئی، پاک بھارت کشیدگی میں کمی کے اقدامات پر بھی روشی ڈالی۔شاہ محمود قریشی نے کہا کہ پاکستان بھارت سے مذاکرات چاہتا ہے لیکن بھارت دو طرفہ مذاکرات سے ہچکچاتا ہے۔
