اسلام آباد (این این آئی) وزیراعظم عمران خان نے کہا ہے کہ نیشنل ایکشن پلان پر عمل درآمد قومی مفاد میں کیا جارہا ہے۔وزیراعظم عمران خان کی زیر صدارت جمعرات کو وفاقی کابینہ کا اجلاس ہوا جس میں قومی سلامتی سے متعلق اہم فیصلوں پر کابینہ ارکان کو اعتماد میں لیا گیا ،نیشنل ایکشن پلان پرعمل درآمد کا جائزہ بھی لیا گیا اور اہم فیصلوں کی منظوری دی گئی۔ ذرائع کے مطابق وزارت داخلہ نے کالعدم تنظیموں پر پابندی سے متعلق وزیراعظم کو بریفنگ دی۔
وزیراعظم عمران خان نے کابینہ ارکان کو پاک بھارت کشیدہ صورت حال پر بریفنگ دی جس پر کابینہ ارکان نے صورتحال معمول پر لانے کیلئے وزیراعظم کے اقدامات کی تعریف کی۔کابینہ اجلاس میں وزیراعظم عمران خان نے کہا کہ نیشنل ایکشن پلان پر عملدرآمد قومی مفاد میں کیا جارہا ہے جبکہ پاک بھارت کشیدہ صورتحال میں مزید بہتری لانے کیلئے کوششیں جاری ہیں، پاکستان ذمہ دار ملک کے طور پر قیام امن کیلئے سفارتی کوششیں جاری رکھے گا۔
