ٹیکساس(مانیٹرنگ ڈیسک) امریکی محققین نے 10 روز ہ تلاش کے بعد غار میں رہنے والی خوبصورت مچھلی دریافت کرلی۔ تفصیلات کے مطابق ٹیکساس کی اے اینڈ ایم یونیورسٹی کی دس رکنی تحقیقاتی کمیٹی نے کیریبین پہاڑوں میں گہرے سمندر کا رخ کیا اور وہاں موجود سمندری جانوروں کی تلاش شروع کی۔

دو غوطہ غور ماہر کائی کوس جزیرے کے ساحل سے پانی کی گہرائی میں گئے اور انہوں نے وہاں پر نایاب مچھلیوں ، کیڑوں سمیت دیگر آبی حیات کی تلاش شروع کی۔ اسی دوران انہیں ایک نایاب قسم کی مچھلی نظر آئی جو غار میں اپنی زندگی بسر کرتی ہے۔ ماہرین نے دعویٰ کیا کہ انہوں نے 10 روز کی طویل محنت کے بعد مچھلی کی ایک نئی قسم دریافت کی، جسے ’سوئمنگ سنپڑ‘ کا نام دیا گیا ہے۔ تحقیقاتی ٹیم کے سربراہ کا کہنا تھا کہ انہوں نے اپنی زندگی میں پہلی بار منفرد شکل کی مچھلی دیکھی جس کے گلپھڑے پیڈل کی طرح اور لمبائی 15 سے 42 سینٹی میٹر ہے۔ پروفیسر ٹام للفی کا کہنا تھا کہ ہم کیریبین کے ساحل پر آلودگی ختم کرنے کے لیے پہنچے تھے تاکہ آبی حیات کی زندگیاں پلاسٹک کی تھیلیوں اور کچرے کی وجہ سے ختم نہ ہوں۔ تحقیقاتی ٹیم کے سربراہ کا کہنا تھا کہ ہم نے ایک مچھلی کو پکڑ لیا تاکہ اُس کا مکمل مطالعہ کرسکیں۔ ڈاکٹر للفی کا کہنا تھا کہ ’سمندر میں ابھی بھی ہزاروں مخلوقات ایسی ہیں جن کا ہمیں علم نہیں، ایک محتاط اندازے کے مطابق اب تک ماہرین صرف 1500 کے قریب مچھلیوں و دیگر آبی حیات کی اقسام تلاش کرچکے ہیں‘۔