جنوبی کوریا(مانیٹرنگ ڈیسک) سام سنگ کا پہلا 5 جی اسمارٹ فون گلیکسی ایس 10 اگلے ماہ متعارف کرایا جارہا ہے اور یہ جنوبی کورین کمپنی کی تاریخ کا مہنگا ترین فون بھی ہوگا۔ رپورٹ کے مطابق اس فائیو جی فون کو گلیکسی ایس 10 ایکس کا نام دیا جائے گا۔
جو کہ مارچ میں صارفین کو دستیاب ہوگا۔ رپورٹ کے مطابق یہ نام کافی حیران کن ہے کیونکہ ایپل کے آئی فون ایکس میں ایکس 10 کے طور پر استعمال ہوتا ہے۔ تو سام سنگ اس لفظ سے ایس سیریز کے 10 سال پورے ہونے پر زور دینا چاہتی ہے مگر یہ ایکسپرینس یا ایکسپنشن کا اظہار بھی ہوسکتا ہے۔ مگر خاص بات اس فون کی قیمت ہے جو کہ 1424 ڈالرز (لگ بھگ 2 لاکھ پاکستانی روپے) سے 1602 ڈالرز (2 لاکھ 22 ہزار پاکستانی روپے سے زائد) تک ہوسکتی ہے۔ اس کے مقابلے میں ایس 10 سیریز کا سب سے سستا فون ایس 10 ای کی قیمت 712 سے 801 ڈالرز کے درمیان ہوگی۔ تو ان دونوں فونز کی قیمت میں اتنا فرق کیوں ہے ؟ ایس 10 ایکس کی فائیو جی موڈیم اور نئی انٹینا ٹیکنالوجی سے ہٹ کر دونوں میں کیا فرق ہوگا؟ تو اس رپورٹ کے مطابق فائیو جی فون 6 کیمروں سے لیس ہوگا جس میں 2 فرنٹ پر جبکہ 4 بیک پر دیئے جائیں گے۔ اس فون میں 12 جی بی ریم، ایک ٹی بی اسٹوریج اور 5000 ایم اے ایچ بیٹری ہوگی۔ اور ہاں یہ فون 6.7 انچ کی سپرامولیڈ اسکرین کے ساتھ ہوگا جو کہ سام سنگ کی تاریخ کا سب سے بڑا ڈسپلے والا فون ہوگا۔ رپورٹ میں مزید بتایا گیا کہ گلیکسی ایس 10 میں آرٹی فیشل ٹیکنالوجی کو خفیہ ہتھیار کے طور پر استعمال کیا جائے گا اور ایک نیا لائف پیٹرن موڈ متعارف کرایا جائے گا جو کہ صارف کے روزمرے کے معمولات کے مطابق خودکار پر مخصوص فیچرز استعمال کرنے میں مدد دے گا۔ خیال رہے کہ سام سنگ کی جانب سے اس فلیگ شپ سیریز کے نئے فونز 20 فروری کو سان فرانسسکو میں متعارف کرائے جائیں گے۔ فائیو جی فون مارچ کے آخر میں جنوبی کوریا میں فروخت کے لیے پیش کیے جائیں گے جبکہ ایس 10 کے دیگر ورژن دنیا بھر میں 8 مارچ کو صارفین کے لیے دستیاب ہوں گے۔
