اسلام آباد(آ ئی این پی)وفاقی حکومت نے بیورو کریسی میں بڑے پیمانے پر تبادلے کرتے ہوئے پاناما جے آئی ٹی کے سربراہ اور ایڈیشنل ڈی جی ایف آئی اے واجد ضیا کو آئی جی ریلویز پولیس تعینات کر دیا جبکہ چیف سیکرٹری آزاد کشمیر میاں وحید الدین کو تبدیل کر کے ان کی جگہ ایڈمنسٹریٹو سروس کے گریڈ اکیس کے ایڈیشنل رجسٹرار سپریم کورٹ داود احمد کو چیف سیکرٹری آزاد کشمیر لگا دیا۔ میاں وحید الدین اورآئی جی ریلویز پولیس ڈاکٹر مجیب الرحمن کو اسٹیبلشمنٹ ڈویژن رپورٹ کرنے کی ہدایت کی گئی ہے۔وفاقی سیکرٹری پارلیمانی امور اشرف احمد
کو اسٹیبلشمنٹ ڈویژن رپورٹ کرنے کی ہدایت کر دی گئی اور ان کی جگہ اورنگزیب حق کو وفاقی سیکرٹری پارلیمانی امور لگا دیا گیا ہے۔کویتی وفد کا پرس چوری کرنے والے جوائنٹ سیکرٹری صنعت و پیداوار ضرار حیدر خان کو اسٹیبلشمنٹ ڈویژن رپورٹ کرنے کا کہا گیا ہے۔ضرار احمد خان کے خلاف انکوائری رپورٹ آنے کے بعد انہیں عہدے سے ہٹایا گیا ہے۔بلوچستان میں تعینات ایڈ منسٹریٹو سروس کے گریڈ سترہ کے افسر طہ سلیم کی خدمات سندھ حکومت کے سپرد کر دی گئی ہیں،اس سلسلہ میں اسٹیبلشمبٹ ڈویژن نے نو ٹیفکیشن جاری کر دیے ہیں۔
