اسلام آباد (آن لائن)ایگزٹ کمپنی کی جعلی ڈگریوں کا سکینڈل منظر عام پر آنے کے بعد بول ٹی وی چینل کو جوائن کرنے والے سینئر اینکرز اور دیگر صحافیوں نے ادارہ چھوڑنے کیلئے ساتھیوں سے صلاح مشورے شروع کر دیئے ہیں۔ بول ٹی وی چینل کی انتظامیہ کی طرف سے دعویٰ کیا گیا تھا کہ وہ ملک کا سب سے بڑا گروپ ہو گا لیکن ایگزٹ کمپنی کے مالک شعیب شیخ کی بدقسمتی یہ ہوئی ہے کہ بول ٹی وی منظر پر آنے سے پہلے ہی اس کمپنی کا ایک بہت بڑا سکینڈل بول پڑا ہے اس سکینڈل کے بارے ایف بی آئی کے ایک سابق ایجنٹ نے کہا ہے کہ یہ سانسیں بند کر دینے والا سکینڈل ہے۔ پیر کو جب جعلی اسناد اور جعلی ڈپلوموں کے اجراءبارے سکینڈل سامنے آئے تو پورے ملک میں تہلکہ برپا ہو گیا۔ اس سکینڈل کے بعد بول ٹی وی کو جوائن کرنے والے معتبر صحافی اپنے ضمیر پر بوجھ محسوس کر رہے ہیں جبکہ بول ٹی وی کے مالکان بھی گزشتہ روز خود کو شدید دباﺅ میں محسوس کر رہے ہیں۔ بول ٹی وی کی انتظامیہ چینل کی نشریات شروع ہونے سے پہلے ہی اربوں روپے کے اخراجات کر چکی ہے اور جعلی اسناد کے سکینڈل کے بعد بول ٹی وی کی اخلاقی حیثیت بھی شدید متاثر ہوئی ہے
مزید پڑھیے:سری لنکا : مچھلیوں کی بارش
اور میڈیا سے وابستہ افراد کا خیال ہے کہ اب بول ٹی وی کی نشریات کا آغاز بہت مشکل نظر آتا ہے اور ایگزٹ کمپنی کے مالکان کو بھرپور جدوجہد کرنا ہو گی اور اس کے باوجود کمپنی کی ساکھ کی بحالی ناممکن نظر آتی ہے۔ بول ٹی وی سے پچھلے چھ ماہ سے وابستہ ایک صحافی کا دعویٰ ہے کہ آنیوالے چند دنوں میں کئی بڑے نام بول ٹی وی کو خیرباد کہہ جائیں گے۔
