اسلام آباد (نیوز ڈیسک) اسلام آباد ہائی کورٹ میں پی ٹی وی ملازمین کی مستقلی سے متعلق دائر کیس میں مینجنگ ڈائریکٹر پی ٹی وی محمد مالک اور کنٹرول ایڈمن سید اطہر عدالت میں پیش ہو گئے ۔ گزشتہ روز جسٹس شوکت عزیز صدیقی پرمشتمل سنگل بینچ نے کیس کی سماعت کی ۔ مینجنگ ڈائریکٹر محمد مالک عدالت میں پیش ہوئے ۔ عدالت نے ان سے پوچھا کہ آپ کے بارے میں تاثر ہے کہ عدالت کے فیصلے پر عملدرآمد نہیں کرتے ۔ جس پر محمد مالک نے جواب دیا کہ یہ تاثر غلط ہے۔ہم عدالت کا احترام کرتے ہیں اور عدالت کے ہر فیصلے پر عمل کریں گے ۔ انہوں نے عدالت کو بتایا کہ 21 مئی کو میٹنگ بلائی گئی ہے جس میں ملازمین کو مستقل کرنے کے حوالے سے لائحہ عمل ترتیب دیں گے ۔ عدالت نے کہا کہ دیکھتے ہیں کہ آپ عدالت کے فیصلے پر کتنا عملدرآمد کرتے ہیں۔ فاضل جج نے آئندہ سماعت 26 مئی تک ملتوی کر دی ۔