واشنگٹن(این این آئی)باخبر امریکی ذرائع نے بتایا ہے کہ صدر ڈونلڈ ٹرمپ کی انتظامیہ حوثی ملیشیا کو دہشت گرد جماعتوں کی فہرست میں شامل کرنے کے لیے کوششیں کر رہی ہے۔امریکی اخبار کے مطابق مذکورہ ذرائع نے بتایا کہ یہ منصوبہ مشرق وسطی میں ایران کے ساتھ مربوط جماعتوں کے حوالے سے سخت موقف اختیار کرنے کے سلسلے میں امریکی مساعی کا حصّہ ہے۔یہ اقدام یمن میں باغی ملیشیا
کو زیادہ تنہا کر سکتا ہے۔ تاہم امریکی ذمّے داران کے بیانات کے مطابق امریکی فیصلے پر عمل درآمد کی صورت میں یمن میں باغیوں کے زیر کنٹرول علاقوں میں انسانی بحران میں اضافے کا اندیشہ ہے۔مذکورہ ذمّے داران نے نام ظاہر نہ کرنے کی شرط پر بتایا کہ امریکی انتظامیہ نے حوثیوں کی سرزنش کے لیے ممکنہ اقدامات کے ایک مجموعے پر غور کیا ہے اور ابھی تک فیصلہ نہیں کیا گیا ہے۔
