اسلام آباد(مانیٹرنگ ڈیسک) پاکستان کی کاروباری خواتین نے وزیر اعظم عمران خان سے مطالبہ کیا ہے کہ حکومت ملکی ترقی کی رفتار بڑھانے کے لئے ان کے مسائل کے حل کو اپنی ترجیحات میں شامل کریں۔ تفصیلات کے مطابق مختلف کاروبار سے وابستہ خواتین نے اسلام آباد ویمن چیمبر کے زیر اہتمام ایک ورکشاپ تقاریر میں حکومت سے مطالبہ کیا ہے کہ معاشی خود کفالت خواتین کے مسائل کا حل ہے مگر اس سلسلہ میں انہیں مشکلات کا سامنا کرنا پڑتا ہے۔ معاشی جدوجہد کرنے والی تاجر خواتین کو پی ٹی آئی کی حکومت
سے بڑی توقعات وابستہ ہیں، ان کا مزیدکہنا تھا کہ سابقہ حکومتوں نے دعوے تو بہت کئے مگر عملی طور پر ان کے اقدامات ناکافی تھے۔ اسلام آباد ویمن چیمبر آف کامرس کی کنسلٹنٹ سارہ انصاری نے کہا کہ اعلیٰ تعلیم یافتہ خواتین کی اکثریت اپنی صلاحیتوں کو ملکی ترقی یا معاشرے کی فلاح کے لئے استعمال نہیں کرپاتیں جس سے ان کی سالہا سال کی محنت ضائع ہو جاتی ہے۔انہوں نے مطالبہ کیا کہ حکومت سرکاری اور نجی شعبوں کو خواتین سے یکساں سلوک کا پابند بنائے اور مزید یہ کہ ان کے لئے متعلقہ قوانین میں نرمی لائی جائے۔
