لاہور(این این آئی)پاکستان کارپٹ مینو فیکچررز اینڈ ایکسپورٹرز ایسوسی ایشن نے نئی منڈیوں کی تلاش کیلئے اپنے طو رپر بھی بھرپور کاوشیں کرنے کے عزم کا اعادہ کرتے ہوئے کہا ہے کہ برآمدات بڑھانے کیلئے اٹھائے جانے والے اقدامات میں حکومت کے شانہ بشانہ چلیں گے ،کارپٹ انڈسٹری کا حکومت پر کسی طرح کا بوجھ نہیں لیکن اگر اس کی سرپرستی کی جائے تو لاکھوں ڈالرز کے زر مبادلہ کے ساتھ

دیہاتوں میں بسنے والوں کو گھر کی دہلیز پر روزگار کی فراہمی کو یقینی بنایا جا سکتا ہے ۔ ان خیالات کا اظہار ایسوسی ایشن کے چیئرمین نعیم ساجد نے ملاقات کیلئے آنے والے وفد سے گفتگو کرتے ہوئے کیا ۔اس موقع پر کارپٹ انسٹی ٹیوٹ کے چیئرمین سعید خان ،سینئر وائس چیئرمین نارتھ زون اعجاز الرحمان ، سینئر ممبر ریاض احمد ، اکبر ملک ،میجر (ر) اختر نذیر اور دیگر بھی موجود تھے۔ انہوں نے کہا کہ کارپٹ ایسوسی ایشن کے زیر اہتمام لاہور میں منعقدہ عالمی نمائش کے انتہائی حوصلہ افزاء نتائج برآمد ہوئے ہیں جس کے انڈسٹری اور پاکستانی معیشت پر خوشگوار اثرات مرتب ہوں گے۔ ہماری کوشش ہے کہ کارپٹ انڈسٹری کو دوبارہ عروج پر لے کر جائیں اور اس کیلئے منصوبہ بندی کر کے پیشرفت کی جارہی ہے ۔ نئی منڈیوں کی تلاش کیلئے اپنے طور پر بھی بھرپور کاوشیں کرنے کا فیصلہ کیا گیا ہے اور اس سلسلہ میں آنے والے چند ہفتوں میں مشاورت کر کے عملی اقدامات کئے جائیں گے۔ حکومت کو چاہیے کہ بیرون ممالک منعقدہ نمائشوں میں شرکت کرانے کیلئے الگ سے فنڈز مختص کیا جائے ۔ انہوں نے کہا کہ کارپٹ انڈسٹری روزگار کے سلسلہ میں دیہاتوں سے شہر وں کی جانب نقل مکانی کو روکنے میں انتہائی موثر ثابت ہو سکتی ہے۔ اگر حکومت سرپرستی کرے تو دیہاتوں میں رہنے والوں کو ان کی گھر کی دہلیز پر روزگار فراہم کیا جا سکتا ہے جس سے نقل مکانی کی جہ سے شہروں پر بڑھتے ہوئے دباؤ کو بھی روکا جا سکتا ہے ۔