اسلام آباد؍ہری پور( آن لائن ) ترجمان گولڑہ شریف دربار سہیل خان کو قتل کر دیا گیا۔ وہ ہری پور کے مقامی اخبار میں صحافی تھے ۔ ہری پور کے علاقے حطار میں منشیات فروش کی گرفتاری کی خبر دینے پر منشیات فروش کے بیٹے نے نامعلوم ساتھیوں کے ہمراہ فائرنگ کر کے قتل کیا۔
آر پی او ہزارہ محمد عالم شنواری نے مقامی صحافی کے قتل کا نوٹس لیتے ہوئے ڈی پی او ہری پور کیپٹن (ر) منصور امان سے رپورٹ طلب کر لی ہے جبکہ پولیس نے ملزمان کی گرفتاری کے لئے ٹیمیں تشکیل دے دی ہیں۔ تفصیلات کے مطابق منگل کے روزترجمان گولڑہ شریف دربار سہیل خان کو ہری پور کے علاقے حطار میں قتل کر دیا گیا ۔ سہیل خان پر عدالت سے واپسی پر نامعلوم افراد نے فائرنگ کی انہوں نے منگل کے روز ہی قتل کی دھمکیاں ملنے پر ڈی ایس پی کو درخواست بھی دی تھی۔ میڈیا رپورٹس کے مطابق سہیل خان ہری پور کے مقامی اخبار میں صحافی تھے اور انہیں منشیات فروش کی گرفتاری کی خبر دینے پر منشیات فروش کے بیٹے نے نامعلوم ساتھیوں کے ہمراہ فائرنگ کر کے قتل کیا۔ آر پی اوہزارہ محمد عالم شنواری نے واقعے کا نوٹس لیتے ہوئے ڈی پی او ہری پور کیپٹن (ر) منصور امان سے رپورٹ طلب کر لی ہے۔ پولیس نے منشیات فروش کے دو بیٹوں کے خلاف مقدمہ درج کر لیا ہے جنہیں جلد گرفتار کرنے کا عندیہ دیا ہے جبکہ پولیس نے ملزمان کی گرفتاری کے لئے چھاپہ مار ٹیمیں بھی تشکیل دے دی ہیں۔
